ကျောက်ဖြူ ဆက်သွယ်ရေးရုံး ဝန်ထမ်းတဦး
“ညက ရာသီဥတု တော်တော်ဆိုးတယ်။ မိုင်၁၂ဝထိ တိုက်သွားတယ်။ဖုန်းလိုင်းတွေလဲ ပျက်တယ်။ အိမ်တွေ ပျက်စီးတာတွေလဲ ရှိတယ်။ နယ်ဘက်တွေမှာ ပိုများတယ်လို့ ပြောကြတယ် ။ အခုအာဏာပိုင်တွေ အပျက်အစီးစာရင်းကောက်နေကြတယ်”
ကျောက်ဖြူ အိမ်ရှင်မတဦး
“ကျမလဲ အိမ်ထဲမှာနေတာဆိုတော့ ဘာမှမသိဘူး။ မြို့လယ်မှာ ခေါင်မိုးတွေ၊ အဆောက်အဦးတွေ ပျက်စီးတာတွေတော့ ရှိတယ်။ ဆင်ခြေဖုံးရပ်ကွက်တွေတော့ ကျမလဲမသိပါ။ အာဏာပိုင်တွေ အဲဒီနေရာတွေကိုသွားပြီး စစ်ဆေးနေပါတယ်။ မနေ့က နေ့ ၂နာရီခွဲလောက်က ည၁၁နာရီခွဲအထိ မုန်တိုင်းတိုက်ခဲ့တယ်။ ဒီမနက်စောစောကလဲ မိုးအရမ်းရွာတယ်”
ဦးမိုးကျော်သူ (ဆက်သွယ်ညှိနှိုင်းရေး တာဝန်ခံ - မင်္ဂလာမြန်မာ လူမှုကူညီရေးအဖွဲ့)
”ကျနော်တို့အဖွဲ့တွေ စစ်တွေမှာရှိတယ်။ လောလောဆယ် သူတို့ကိုဆက်သွယ်မရ ဖြစ်နေတယ်။ ကျနော်တို့ အချက်အလက်တွေ စုနေပါတယ်။ လောလောဆယ်မှာ ကိန်းဂဏန်းတွေ ပြောဖို့ခက်နေပါတယ်။ မကြာခင်မှာကျနော်တို့ လုပ်ဆောင်သွားဖို့ ရှိပါတယ်”
မာန်အောင် ရေလုပ်ငန်းရှင်တဦး
အပျက်အစီးကတော အဲလောက်မရှ်ိဘူး၊ မြို့ထဲမှာတော့မဖြစ်ဘူး။ အပင်တွေဘာတွေလဲတာ တို့ လောက်ပဲရှိတယ်။ ဒီနေ့ကတော့ ကောင်းပါတယ်။ ဒီဘက်မှာ ဆိုးဆိုးဝါးဝါးမရှိဘူးဆိုတော့ ကယ်ဆယ်ရေးတွေ မလာကြတာထင်တယ်။ နယ်ဘက်တွေမှာတော့ မုန်တိုင်းဒဏ်ခံ ရတယ်ကြားတယ်။ ဆက်သွယ်မရသေးဘူး။ ကျောက်ဖြူမှာတော့ တော်တော်ဆိုးတယ်ကြားတယ်”
ကျောက်ဖြူခယကရုံး စာရေး တဦး
”ကျောက်ဖြူတမြို့လုံးနီးပါး အဆောက်အဦးတွေ ပျက်စီးတယ်။ ကျနော်တို့ဆီကိုတော့ သတင်း တက်မလာသေးဘူး။ အခုရပ်ကွက်စာရေးတွေ စာရင်းကောက်နေတယ်။ နယ်ဘက်က စာရင်းတွေ တက်မလာသေးဘူး။ ဖုန်းလိုင်းတွေလဲ မရသေးဘူး။ အခုဒေသအာဏာပိုင်တွေ ကြက်ခြေနီနဲ့ ပေါင်းပြီးလမ်းတွေ လိုက်ရှင်းနေတယ်။ နောက်ပြီးတော့ ကယ်ဆယ်ရေးတွေ လုပ်နေတယ်။ ဒေသခံတွေကို ရိက္ခာဝေပေးနေတယ်။ ကျောက်ဖြူမှာ အိုးအိမ်ပျက်စီးတာ က၂ဝဝဝ ကျော်လောက်ရှိတယ်။ လူအသေအပျောက်တော့ မရှိပါဘူး။ ဒေသခံတွေ စားဝတ်နေရေးကို အာဏာပိုင်တွေ လုပ်ဆောင်နေပါတယ်”
ရေလုပ်ငန်းရှင် (စစ်တွေ)
(မြန်မာ စံတော်ချိန် ညနေ ၄ နာရီခွဲ)
”ရာသီဥတုက ဆိုးနေပါတယ်။ မုန်တိုင်း ဒီနေ့တိုက်မယ်လို့ ပြောတယ်။ အခု မိုးရွာနေတယ်။ နည်းသေးတယ်။ နောက် များလာဖို့ အနေအထား ရှိတယ်။ ဘာဖြစ်လို့လဲဆို ဒီရေတက်တဲ့ အချိန်နဲ့ လာနိုင်တယ်။ ဒီရေကျနေတဲ့အချိန်ဆိုတော့ သိပ်မဆိုးဝါးသေးပေမယ့် ဒီရေက ညနေလောက်မှာ တက်မယ်ဆိုတော့ ဆိုးလာနိုင်တယ်။ လေပြင်းတိုက်နေတယ်။ စိုးရိမ်ရတဲ့ အနေအထား ရှိတယ်’’
’’ဒီမှာက ကြိုတင်ပြီးတော့ ကျေးရွာတွေက လူတွေကို မယက အစီအစဉ်နဲ့ ရွှေ့ပြောင်းပေးတာတွေ ရှိတယ်။ မော်တော်စက်လှေတွေနဲ့ အနီးအနားမှာရှိတဲ့ ကျေးရွာတွေက လူတွေကိုပါ။ နယ်ဘက်ကျေးရွာတွေမှာ မိန်းမတွေ တယောက်မှ မရှိတော့ဘူး။ ဘေးကင်းရာ ပြောင်းကြပြီ။ တအိမ်မှာ တယောက်ပဲ ကျန်တော့တယ်’’
’’မြို့ပေါ်မှာရှိတဲ့ လူတွေအတွက် သိပ်မစိုးရိမ်ရပေမယ့် နယ်ဘက်တွေမှာတော့ ဒီရေတက်လာတဲ့ အချိန်မှာဆိုရင် လယ်ယာမြေတွေကို ဆားငန်ရေတွေ ဝင်မယ်။ ပုစွန်ကန်တွေ ပျက်စီးမယ်။ ပုစွန်ကန်တွေကို ဆားငန်ရေ ဝင်ရင်နစ်နာတာပေါ့။ မြို့ပေါ်မှာရှိတဲ့ လူတွေထက် နယ်ဘက်တွေမှာရှိတဲ့ လယ်သမားတွေ ပုစွန်တာတွေ ပျက်စီးမယ်။ ပထမ တခေါက်ကလည်း ပျက်စီးခဲ့ပြီ“
ကုန်စုံဆိုင်ပိုင်ရှင် (စစ်တွေ)
(မြန်မာစံတော်ချိန် နေ့လည် ၁၂ နာရီခွဲ)
“အခုတော့ မိုးနည်းနည်းရွာနေတယ်။ လေလည်း တိုက်နေတယ်။ ဒီမှာတော့ မီးသတ်ဌာနက မြို့ကိုပတ်ပြီးတော့ မုန်တိုင်းသတင်း သတိပေးချက်တွေ လုပ်နေတယ်။ လူတွေကတော့ ပြင်ဆင်မှုတွေ လုပ်နေကြပါပြီ“
စက်လှေပိုင်ရှင် (ကျောက်ဖြူ)
(မြန်မာစံတော်ချိန် နေ့လည် ၁ နာရီ)
“ဒီနေ့တော့ လေပြင်းတိုက်နေတယ်။ ၁ နာရီကို ၃၅ မိုင် တိုက်နေတယ်။ ပျက်စီးမှုတွေတော့ မရှိပါ။ အာဏာပိုင်တွေကတော့ ကားတွေနဲ့ မြို့ကိုပတ်ပြီး ပြည်သူတွေကို မုန်တိုင်းသတိပေးချက်တွေ လုပ်နေတယ်။ ပင်လယ်ပြင်နဲ့နီးတဲ့ ကျေးရွာက ဒေသခံတွေကို စာသင်ကျောင်းတွေဆီ ပြောင်းရွှေ့ဖို့ အဲလိုမျိုး ဆော်သြတာတွေ ရှိတယ်။ တချို့ကတော့ ပြင်ဆင်တာတွေ လုပ်ထားတယ်။ မြို့ရဲ့ အစွန်အဖျားက လူတွေကို စာသင်ကျောင်းတွေဆီ ပြောင်းရွှေ့ဖို့ သတိပေးတယ်။ နယ်ဘက်တွေမှာတော့ ပြောင်းရွှေ့နေကြတယ်လို့ ကျနော်တို့ ကြားရတယ်“
အိမ်ရှင်မ (စစ်တွေ)
(မြန်မာစံတော်ချိန် မွန်းလွဲ ၁ နာရီခွဲ)
“စစ်တွေ ကမ်းနားလမ်းရပ်ကွက်မှာနေတဲ့ ဒေသခံတွေ အကုန်လုံး ဘေးလွတ်ရာကို ရွှေ့နေကြပါပြီ။ မြစ်ကမ်းနားနဲ့နီးတဲ့ ဒေသခံတွေပါ။ ကိုယ့်အစီအစဉ်နဲ့ကိုယ် ပြောင်းနေကြတာပါ။ စက်လှေတွေကို မထွက်ဖို့ အာဏာပိုင်တွေ တားမြစ်ထားတာတွေ ရှိတယ်။ အခုအချိန်တော့ လေငြိမ်နေတယ်။ လေငြိမ်ရင် စိုးရိမ်ရတဲ့ အခြေအနေ ရှိတယ်လို့ လူတွေက ပြောကြတယ်။ မီးသတ်ဌာနက မြို့ကိုပတ်ပြီး မုန်တိုင်း သတိပေးချက်တွေ လုပ်ဆောင်နေတယ်“
...................................................................................................
ရန်ကုန် ။ ။ မုန်တိုင်းရှေ့ပြေးအဖြစ် ရခိုင်ပြည်နယ် ကျောက်ဖြူမြို့သို့ ယနေ့ နံနက်မှစ၍ လေပြင်းများ ကျရောက်နေကြောင်း ဒေသခံများအဆိုအရ သိရသည်။
’’လေကတော့ မုန်တိုင်းတိုက်မယ့် လေပုံစံမျိုး တိုက်နေတယ်။ လေသွယ်နေတဲ့ သဘောပေါ့။ ခုန ၁၂ နာရီ မိနစ် ၄ဝ လောက်ကထက် နည်းနည်းပိုလာတယ်။ ပြီးတော့ မိုးလည်း ပါလာတယ်’’ ဟု ကျောက်ဖြူ မြို့ခံတဦးက မဇ္ဈိမကို ပြောသည်။
ကျောက်ဖြူတွင် မုန်တိုင်းတိုက်မည်ဖြစ်သဖြင့် ကြိုတင်ပြင်ဆင်မှုများ ပြုလုပ်ရန် မယက မြို့နယ်ကောင်စီက တမြို့လုံးအနှံ့ လှည့်လည်ကာ အသံချဲ့စက်ဖြင့် လိုက်လံသတိပေးနေသည်။
တောင်ကုတ်မြို့နယ် မအီ၊ လမူး အစရှိသည့် ကျေးရွာများနှင့် မာန်အောင်မြို့ဘက်တွင်လည်း လေပြင်းနှင့်အတူ မိုးရွာသွန်းမှုပါ ရှိနေကြောင်း ဒေသခံများအဆိုအရ သိရသည်။
’’အထုပ်တွေတော့ ထုပ်ထားတယ်။ မုန်တိုင်းကတော့ ကျောက်ဖြူနားမှာလို့ ရေဒီယိုက ပြောတယ်။ လေဖျားခတ်မယ့် အနေအထားဆိုရင်လည်း ဘယ်လိုလာမယ်မှန်း မသိဘူး။ ဆိုတော့ လိုအပ်လို့ ပြေးရရင်လည်း ရှိတာလေးတွေကို သယ်လို့ရအောင်’’ ဟု တောင်ကုတ်မြို့နယ် ပန်းထော်ကျွန်းမှ ဒေသခံတဦးက ပြောသည်။
မိုးလေဝသနှင့် ဇလဗေဒပညာရှင် ဒေါက်တာထွန်းလွင်က 04B GIRI အမည်ရှိ အင်အားကောင်း ဆိုင်ကလုန်း မုန်တိုင်းသည် ယနေ့နံနက်တွင် ရခိုင်ပြည်နယ် အလယ်ပိုင်းကို စတင်ဖြတ်ကျော်နေပြီး၊ လေတိုက်နှုန်းမှာ တနာရီလျှင် ၇၅ မိုင်အထိ ရှိနိုင်သဖြင့် အန္တရာယ်ကြီးအဆင့်သို့ ရောက်နေကြောင်း ပြောသည်။
’’ဒီရေတက်မယ်။ တနာရီ ၇၅ မိုင်ဖြစ်တဲ့အတွက် ၅ ပေကနေ ၆ ပေလောက်ထိ တက်နိုင်မယ်’’ ဟု သူက ဆိုသည်။
နိုင်ငံပိုင် သတင်းဌာနများက စစ်တွေနှင့် ကျောက်ဖြူ ဒေသသို့ ယခုအခါ အနီရောင်အဆင့် မုန်တိုင်း တိုက်ခတ်နေပြီး၊ မိုးသက်လေပြင်းများ ကျကာ မြေပြင်ရေပြင်လေမှာ တနာရီလျှင် မိုင် ၂ဝ နှုန်း ဖြစ်ကြောင်း ကြေညာနေသည်။
၂ဝဝ၈ ခုနှစ် မေလဆန်းတွင် ဘင်္ဂလားပင်လယ်အော်မှ ဝင်ရောက်သည့် နာဂစ်ဆိုင်ကလုန်းသည် တနာရီလျှင် မိုင် ၁၂ဝ အထိ တိုက်ခတ်ခဲ့သဖြင့် ဧရာဝတီတိုင်းအတွင်း လူ ၁ သိန်း ၄ သောင်းခန့် သေကြေပျောက်ဆုံးကာ ၂ သန်းခွဲ အိုးမဲ့အိမ်မဲ့ ဖြစ်ခဲ့ရသည်။
http://www.mizzimaburmese.com/news/breaking-newsbrief/6322-2010-10-22-07-17-17.html
0 Responses to မုန်တိုင်း နောက်ဆက်တွဲ