သင်းသဇင်ခိုင်
----------------
ကျောက်ဖြူတွင် ခရိုင်ရဲမှူးကြီးမှ ပျက်စီးသွားသော ရဲအဆောက်အဦးများ ပြန်လည် ပြုပြင်ရေး အတွက် လုပ်ငန်းရှင်ကို ခေါ်ယူပြီး အစည်း အဝေးတစ်ရပ် ပြုလုပ်ရာ အစည်းအဝေးမှာ စပြီး ခဏအကြာတွင် ရပ်တန့် လိုက်ရကြောင်း သတင်း ရရှိသည်။

လွန်ခဲ့သော သောကြာနေ့က ကျောက်ဖြူ ခရိုင် ရဲမှူးကြီးမှ ကျောက်ဖြူမြို့ပေါ်မှ လုပ်ငန်းရှင် ၃၀ ခန့်ကို ခရိုင်ရဲမှူးကြီး ရုံးသို့ ခေါ်ယူပြီး ပျက်စီးသွားသော ရဲစခန်းများ ပြန်လည် ပြုပြင်ရေး အတွက် အကူအညီများ တောင်းခံသည့် အစည်းအဝေး တရပ်ကို ပြုလုပ်ခဲ့သည်ဟု သိရသည်။

အဆိုပါ အစည်းအဝေးတွင် တက်ရောက်လာသူ တစ်ဦးမှ မိမိအိမ်ကို မိမိပြုပြင်ရန်အတွက် အကူအညီ လိုနေသဖြင့် ကျောက်ဖြူ ရဲစခန်းများ ပြန်လည် ပြုပြင်ရေး အတွက် မိမိအနေဖြင့် အကူအညီ မထည့်ဝင်နိုင်ပါကြောင်း ပြန်လည် တင်ပြရာမှ အစည်းအဝေး ပျက်သွားကြောင်း သတင်း ရရှိသည်။

အမည်မဖေါ်လိုသူ လုပ်ငန်းရှင် တစ်ဦးက “ အစည်းအဝေးကို ညနေပိုင်း ၄ နာရီမှာ စလုပ်တာ ဖြစ်ပါတယ်။ ရဲမှူးကြီးပြောတာက ပျက်စီးသွားတဲ့ ရဲအဆောက်အဦးတွေကို ပြန်ပြင်ဖို့ သက်ဆိုင်ရာ ၀န်ကြီးဌာနက ကိုယ့်အစီအစဉ်နဲ့ ကိုယ်ပြင်ပါလို့ ညွန်ကြားလာတဲ့ အတွက် ခုလို အကူအညီ တောင်းခံရတာ ဖြစ်တယ်လို့ ပြောဆိုပါတယ်။ ဒါပေမယ့် တက်ရောက်လာသူ တစ်ဦးက ခုလို ပြောလိုက်တဲ့ အခါ အစည်းအဝေးက ဆက်မတိုးနိုင်ဘဲ ရပ်တန့်သွားခဲ့ပါတယ်” ဟု ပြောသည်။

ယခုကဲ့သို့ ပြည်သူများ ဆိုင်ကလုန်မုန်တိုင်းကြောင့် အကြီးအကျယ် ဒုက္ခရောက်နေစဉ်တွင် ရဲစခန်း ပြန်ပြင်ရေးအတွက် လူထုထံမှ အကူအညီ တောင်းခံရန် စီစဉ်သော ရဲမှူးကြီး၏ လုပ်ရပ်ကို အများက နားမလည် နိုင်အောင် ဖြစ်နေကြကြောင်း သတင်း ရရှိသည်။

http://www.narinjara.com/detailsbur.asp?id=2830